Menu

فوزية الطالبي
لا يوجد مترحم على فوزية الطالبي

انا لله وانا اليه راجعون، الزميلة فوزية الطالبي في ذمة الله.

 
 

 

 

الله اكبر ان لله وان اليه راجعون
توفيت المعلمة النائبة فوزية الطالبي التي اضرمت النار في جسدها امام مندوبية التعليم بالكاف بسبب الظلم و القهر 😨😰
في ظرف 4 سنين من حكم النداء شفنا جميع انواع الكوارث .. ناس تحرق في رواحها و ناس تحرق في البحر و ياكلها الحوت وناس تموت مالبرد وناس تموت مالجوع و رقم قياسي في عدد المنتحرين و بعد هذا الكل يمدو وجوهم بكل وقاحة ويحبو الناس تعاود تنتخبهم
رحم الله الفقيدة ورزق اهلها جميل الصبر والسلوان و إنا لله وإنا إليه راجعون
هي #معلّمة_نائبة في مدرسة في أرياف الكاف …
 
معلمة شابة دخلت نافحة … تحب تقرّي الصغار وتبني مستقبلها وتكون علاقات زمالة طيبة مع زملاءها المربين ..
 
معلمة نائبة .. دخلت لمؤسسة تربوية تصدمت …
 
شافت معاملة زميلها المعلم للتلاميذ الصغار تفجعت …
 
معلّم يضرب في الصغار بالعصا على رؤوسهم … بالكاوتشو على ظهورهم … بالي يجي في يدو في اي بلاصة ..
 
التلامذة كل يوم ينقصو من المدرسة … تلامذة خيروا يبطلو القراية و ما يمشيوش للذل و العذاب …
 
الأولياء ..بسطاء … خافوا … وما شكاوش.. وخلاو صغارهم من غير قراية …
 
المعلمة النائبة شكات .. حكات مع الاولياء… حكات مع المدير …
 
المدير … صاحب المعلم …
 
المدير ستانس يهز التلانذة يخدمهم في دارو وفي أرضو ..
 
المدير تقلّق من المعلمة النائبة … المعلم تقلّق من زميلتو النائبة …
 
المعلمة النائبة صورت المعلّم وهو يعذّب في التلامذة …
 
مشات شكات … للمندوبية … للوزارة … 
الرد كان سريعا …
تم نقل المعلمة النائبة من المدرسة… هزوها لمدرسة اخرى في منطقة نائية … تبعد عليها 7 كلم … فمة كرهبة وحدة تهزلها … سائق الكرهبة ضغطوا عليه باش ما يهزهاش … 
 
المعلمة النائبة ما عادش تنجم تمشي تخدم …. وما عادش تنجم تقرّي … 
 
والمعلم و المدير يخدمو … و المندوب يخدم …والوزير يخدم …
 
المعلمة النائبة شكات و حفات ساقيها .. ما تلقى كان التسويف والتجاهل و المماطلة …
 
المعلمة النائبة عطات الفيديو للتلفزة عداتو … تحل بحث و تحقيق و محاكمة ….
 
الاولياء الكل استعرفو الي هوما في بالهم وما يحبوش يشكيو ..
 
المحكمة حكمت على المعلم والمدير عامين سجن مع تاجيل التنفيذ …
 
المعلمة النائبة زادت شكات وحفات ساقيها .. وكالعادة ما لقات كان التسويف والتجاهل و المماطلة …
 
المعلمة النائبة في لحظة قهر وضعف وانهيار حرقت روحها ….
 
المعلمة النائبة عدات جمعتين في السبيطار …. وتوفات …
 
المعلمة النائبة توفات …والمعلم و المدير يخدمو … والمندوب يخدم … والوزير يخدم …
 
رحم الله فوزية الطالبي …
منقول
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *