الله اكبر .
الزميلة اقبال القطي تلتحق بزوجها زميل ايضا بسبب مرض السرطان و تترك بنتين في عمر الزهور…اللهم اجعل لنا مخرجا…و ارحم موتانا و احيائنا…
و الله نحس فيها ظلامت طول استغفر الله العظيم.
ان لله و انا اليه راجعون…
عندما دخلت لمعهد الطيب المهيري صفاقس في سبتمبر 2013 التقيتها أستاذة عربية مبتسمة لا تفارق الابتسامة محيّاها رغم ملامح التعب الشديد على وجهها عادت بنا الذاكرة إلى أيام الجامعة وبعد أيام اكتشفت أنها تصارع مرض السرطان . أخبرتني بالأمر دون تشكّ ولا بكائيات . فوجئت بهذه القوة الرهيبة داخلها . مقبلة على الحياة تصارعها . مسؤولة عن بنتين فارق أبوهما الحياة بسبب مرض السرطان أيضا . كلّما سألتها السؤال الكلاسيكي ” شحالك ” إلا و أتلقّن درسا في الحياة ” و الله الحمد لله يا محمّد تاعبة كيف الناس الكل أوكة انا زايدة شوية عالناس أنا الأم و انا البو الخدمة و الصغار و مشاكلهم و طلباتهم مدرستهم و قرايتهم وصّل هذي جيب هذي و المرمّة نكمّل في الدار ربي يسهّل و ماك تعرف مشاكل البني و الصنايعية أما الحمد لله لاباس اللازم لازم و ربي يعطينا القوة الناس الكل .” عمرها ما تقلّك انا مريضة . الحفلات الي عملناهم في المعهد الكل تجيهم تحضر مع نادي الحكاية
إقبال رحلت البارح في وقت متأخر رحلت خلات زوز بنيّات زوز نوّارات . خلاّت وجيعة كبييييرة في قلوب أهلها و في قلوب زملائها و أصدقائها و في قلوب تلامذتها
إقبال رحلت و خلات لوعة و ألم في قلوب بنيّاتها
إقبال الأم إقبال الأب. زوز نوّرات صبحوا اليوم من غير أم و أب
ربي يرحمك يا إقبال في جنات النعيم زميلتي العزيزة .
ربي معاكم يا رؤى ربي يرزقكم الصبر انت و أختك الصغرونة . كلام التعزية الكل ما عندو حتى معنى . كلمة برك ربي معاكم
منقول عن الأخ محمد معلى Mohammed moaalla
اترك تعليقاً